ko·ko·dri 🐊

bouki te kouri lɑchɑs. li te mɑlere. don so lɑchɑs li te tchwe en fezon. lɑ ou bouki tɑpe lɑchɑs ye te gen en vyefonm ki te reste don en vye plɑs konpony. so mɑri te konpè tig e li te gen en tɑ de mouton. konpè tig te koutim kite so fonm e kou trɑvɑy pou plizyè jou. se lɑ bouki rive. vou konnen bouki te en nonm goumon. kon bouki wɑ mouton ye li vini che vye fonm lɑ ek so fezon li tchwe. e la li di: gronmomon vou pɑoule en fezon? vye fonm lɑ reponn: wi mo piti mɑ pronn en fezon. lɑ bouki pɑti li kou che li. lonnmen maten bouki coou che vye fonm lɑ. li di vye fonm lɑ gronmomon mo vini chese pemon mo fezon. vye fonm lɑ reponn: men bouki mo te krwɑ to te donn mwen fezon lɑ. bouki reponn: o non mo pɑkɑ donn mo fezon pou ayen. vye fonm lɑ di: mo gen de mouton ma donn twa enn. lɑ bouki vini ek so gron sɑk pou pòte so mouton. vye fonm lɑ te gen plizyè mouton e bouki vini tou le mɑten jiskɑ li te pronn tou moutonye. o dèyen konpè tig rive lswa. kon li rive so vye fonm rɑkonte li konmon bouki te vini blofe li p tou so moutonye. la tig di so vye fonm dimen maten bouki vɑ vini ɑpe so mouton. to vɑ met mwen don en sɑk e mɑre mwen e ponn mwen o solivo e to vɑ di li se dennye mouton to gen e to tchwe li tou pɑre e met li don sɑk pou li. la lonnmen mɑten bouki rive konm toujou. li di: gronmomon mo vini chèse pemon mo fezon. vye fonm lɑ reponn: mo gen li tou pare mo tchwe mo dennye mouton mo piti mo gen li ɑpe ponn don en sɑk. to gen jis pou pronn li e pɑti ek li. bouki trɑpe sɑk lɑ pou met on so do e pɑti ek li tro konton. la tig lɑ te gro. bouki krwa se en gro mouton li te byen konton. kon bouki pɑti li fe en seten distons opopre en mil tig lɑ ki te gen de gron grif li pike bouki ontrave sɑk lɑ. li fe li mɑl dison sòti. men bouki te si fyè so mouton li te paoule met so sɑk pɑte. li kouri konm sɑ en bon bout. men tig pike li on trwa fwa. segon fwɑ li pike li di. bouki pale met so sɑk pɑte men trwazyenm fwɑ li pike li si move li di: mole wɑ sɑ gronmomon met don sɑk lɑ mo blije wɑ ki sɑye kɑpe blese mwen konm sa. li met sɑk lɑ pɑtè. kon li met sɑk lɑ pɑtè li demɑre li. kon li wɑ sɑ ki te don sɑk lɑ li konke vonnwi li te si pè. vou konnen bouki se ten gron kapon. men konpè tig pɑ pèd diton. ye te don en gron pleri e nɑve pɑ vwazen ditou. konpe tig sote on fouti mɑlen lɑ li mɑsɑkre li. li fini pɑ tchwe li don pleri lɑ.

e nave enn plɑs nɑve en vye mezon pesonn te kɑpɑ reste lɑ. men jon sòt di li sre pɑse lɑ nwi lɑ si ye sre donn li en ti kòchon e lɑfɑrin pou li fe en bon soupe. ye donn li tou sɑ. pondon so soupe tɑpe tchwi on dife li ɑsit on en bon. et lɑ li di: mo tou sel isi ɑswɑ. li di sɑ onkò li te pɑ byen si li cri tonn en lɑvwɑ. sɑfe li di: nou nou a de. lɑ pè pronn li, li pɑti gɑlope. li sote don en pyes dekonn on en chivrey. li bòde pɑt chivrey lɑ e li di: si vou ple michye chivrey sòti don mo chenmen kite en nonm gɑlope ki kɑ gɑlope. e la li sote don senmen e li di: sɑ fe cho ɑswɑ en paròl di: mo se pɑ sɑ tɑ di tɑlè. kon jon sòt tonde sɑ li pron tronmble li i pli pè onkò li pi gɑlope li vole konm en bɑl. li te pɑ menm wɑ ou li tɑle. li bòde kont en nɑb jimel li tonmbe. so lɑtet pɑse ont de nɑb ye e li trongle a mò.

bouki e lonpen te mɑlere. ye te konmonse en rekòlt ye te monke et ye te li gen ayen pou monje. sɑfe bouki ki te en gro nonm e ki te monje en tɑ di lonpen: konpè lonpè onnon vonn nou momon pou kouchkouch dou. o non reponn lonpen: mo pɑoule vonn mo momon. la bouki di: si to pɑoule vonn to momon to pɑle gen mo kouchkouch. dek li di cha li kou che li li trɑpe so momon e met li don en gron sɑk. li te gen pou trɑvèse en gron bwɑ ki te gen jis en chimen, e chimen lɑ te foure on chak bò. bouki vonn so momon pou trwɑ bɑri kouchkouch dou. li met ye don so wagon ɑ kɑt chwɑl. li pɑti pou kou che li. ɑpe li te fe en ti bout chimen li wɑ en lonpen ki te kouche devon li. on on: li di: to te pɑoule von to momon astè to mouri lafen. en pe pli lwen li wɑ en nòt lonpen. li kou en ti bout òkon li wɑ en trwɑzyenm. sɑfe li di: si mo sre rɑmɑse tou lonpen ye mo sre gen en tɑ lɑvyonn pou mo piti ye. la li rete so wɑgon li desonn e pɑti dèyè pou rɑmase ye. men se te konpè lonpen ki te fel tou don bwɑ e ɑpe kouche don chimen devon li. bouki te gen pou kou lwen. safe kon li te pɑti en bout lɑ ou chimen te fe en tou konpè lonpen leve. li koupe latchye chwɑl ye e tere ye e kite jis en ti bout poil deyò lɑtè. li senmen en ti pe kouchkouch ontou pwɑlye e lɑ li pɑti ek wagon e kouchkouch bouki. kon bouki vini li wɑ lɑtchye tou so chwɑl ye don lɑtè. li di: o mo chwal e mo wagon rontre don lɑtè. lɑ li ponye en lɑtchye e li ɑle si fò li tonmbe pɑtè. li ponye en nòt e lòt e lòt e chɑk fwa li te tonmbe pɑtè. safe li pron fouye. li te ɑ gen gron grif. sɑ te kou dousmon e li te prese. tig vini pɑse. li di: konpè tig si vou ple mo wɑgon mo kouchkouch e mo chwal ye tou rontre don lɑtè. si vou ple vou vini fouye ye pou mwen. sɑfe kon konpè tig te fouye e jis so kroupyon te deyò bouki konmonse mire li. li pɑse so lonmon on so kroupyon e di: e si bebɑ mo fonm e mo piti ye sre gen sɑ lɑbɑ ye sre konton wi. joli kroupyon konm sɑ sre fe bon roti. se la bouki pèd pɑsyons. li fou konpè tig en kout kouto. men li monke li li jis blese li. bouki chɑpe e tig chɑpe chaken ye kote. konpè tig jw~èn konpè lonpen e rɑkonte li sɑ bouki te fe. sɑfe lonpen di li: sel monyen pou pron bouki se kou lɑchɑs tɑ tchwe en tɑ jibye e kouvè twɑ lɑ tet e tou ek ye. to vɑ les mwen monte on to do e mo vɑ kondwi twɑ che bouki pou monnde li pou dolo. safe konpè tig tchwe en tɑ jibye. li kouvè so lɑtet e tou. kon lonpen rive che bouki pou dolo bouki di: men ou to sò to fe en bon lɑchɑs to tchwe en tɑ jibye. lonpen di: wi mo tchwe en tɑ jibye. la bouki di: ti jonfout ou to pron chwɑl mo gronpopɑ donn mwen? konpè lonpen reponn: men konpè bouki mo te pɑ konnen se te to chwɑl. tchen to chwɑl eskize mwen. lonpen pɑti. lɑ bouki konmonse ote jibye ye. li pele bebɑ e tou so piti ye. talè kon li rive ɑ lɑtet tig li konnet li. li pele lonpen. lonpen mo tronpe mwen se pɑ mo chwɑl. men konpè tig sote on li e bimen li. li grɑfinye li on tou so kò jiska li tchwe li. pondon ye te pe bɑt konmpè lonpen sòti dèyè en nɑb e rɑmɑse jibye ye e chape che li.

en nòt fwa bouki e lonpen trouve ye menm byen mɑlere. ye te pɑ konnen konmon trouve monyen pou genyen kichòz pou monje. sɑfe lonpen di: bouki mo gen en plon. trouve en gro kɑlbɑs fe en trou don li. to vɑ met mwen don li e nou vɑ kou vwɑyɑze e nou va fe moun krwɑ to gen en kɑlbɑs ki ka chonte. konmsa nou va rɑmɑse en tɑ lɑjon. kon to vɑ vini pɑmi moun to vɑ pɑle kɑlbɑs e mo vɑ chonte. safe bouki trouve en gro kɑlbɑs. li fe en trou don li. lonpen rontre e ye pɑti pɑmi moun. kon ye rive lɑ bouki di: dje fonn dje mo kɑlɑbɑs. lɑ lonpen repon don kɑlbɑs lɑ mo: mo tring tring tring mo trenng trenng trenng mo bek ɑ lɑ bourek chonmbɑ michye beko. ye rɑmɑse en tɑ lɑjon. tou moun te krwɑ se kalbas ki te chonte. sɑfe kon sɑ vini pou pɑtɑje lɑjon bouki jis donn lonpen en sensou. lonpen te pɑ konton. li di limenm: mɑ pron li en nòt fwɑ. lòt fwɑ ye tɑle fe en pli gron sòti pɑmi moun. ye te ponse fe pli lɑjon. sɑfe ye rive don en gron vil. bouki mete so kɑlbɑs ek lonpen on ò en gron lɑtɑb. li di moun ye so kɑlbɑs tɑle chonte pou ye. li kriye: dje fonn dje mo kɑlɑbɑs. lonpen reste tronkil. bouki te byen trɑkɑse. li ponse lonpen te petet towe. li kou rɑ lɑtɑb li mete so lɑbouch kole kont kɑlbɑs lɑ e di: chonte lonpen ye nɑ en tɑ moun. si to pɑ chonte moun ye vɑ tchwe nou zòt. lonpen di: wi mo vɑ chonte. bouki fe kek pɑ kote moun ye e li ele: dje fonn dje mo kɑlɑbɑs. lito reponn lonpen sòti don kɑlbɑs lɑ e di moun ye bouki te jis ɑpe blofe ye. ye sote on li ɑ kout bɑton e kout pye e bimen li jiskɑ li mouri.